تعال يابني طلبتك لاتخليني
احتاج خدمتك يالغالي على شاني
ابيك في خلوتي تجلس تسليني
اليوم عمري كبير وصرت تعبانِ
اقول خلك محلك في بساتيني
وانا همومي ورى شغلي ودكاني
ازعجتني بالندا وانت تناديني
ازعجت كل العرب وازعجت جيرانِ
لاصار كثرت علومك في عناويني
والله من البيت تطلع وانت زعلانِ
يابني بعد ماربيتك صرت تجزيني
كره وبغض وزود البغض عصيانِ
ابليس ضيعك في وسط الميادينِ
تهت الطريق وسلكت دروب شيطانِ
يابني جفى النوم وانت تجفيني
الواجب العطف من قلبك والاحسانِ
علمتك المرجلة والعلم والدينِ
ولاعمري مرة نسيتك يوم تنساني
انا احسب انك بعد هالعمر تشريني
وانت تبيع الغلا بالسوق مجاني
يابوي انا جيت لك وابغاك تعفيني
وارجي السموحة وانا نادم وحسرانِ
تايب من الذنب كله يابعد عيني
وانا على خدمتك بالحيل عطشانِ
حسبي من اللي على ذكراك ينسيني
شوهك بفكري وحطك ضمن عدواني
لك منزل فوق راسي وراحة يديني
اجعل حياتك وروحك داخل احضاني
لاعاد شي على خدمتك يلهيني
يارب انا طالبك عفو وغفرانِ
تعال يانور عيني وزهرة سنيني
مافات مات وترى الايام تقفاني
ابوك ياقف معك بالعسر واللينِ
ويبيك ترفع مقامه بين الاعيانِ
رضيت عنك عسى الايام تنسيني
ايامنا اللي مضت عمت بالاحزانِ
يامنبع الود ياورد البساتينِ
انت حياتي وروحي كل الاحيانِ
نطلب من الله يثبتنا على الدينِ
وبطاعة الوالدين نوصي بها اخواني
اتمنى انها تعجبكم
بنت السلطان